مجلة نداء الرؤح

وصيه اب للشاعر **عادل الشهابي**

******وصيه أب ******

بنتى وحبيبتى وضى عينى ...

أسمعى يا بنتى قبل الموت ما يجينى ..

بلاش بالعويل والصراخ تودعينى ...

وكمان بالدعوات بلاش تنسينى ....

بنتى الغاليه بالكلام أرجع وأعود ...

ودعينى ببسمه وباقه من الورود ....

وأعرفى يا حبيبتى إن اللى راح

خلاص مش يعود ...

من أمك يا حبيبتى خدى بالك ...

هى اللى فى الدنيا يا حبيبتى أبقالك ..

وأنتم يا ولادى الشباب ....

أهتموا بدراستكم وأقفلوا عليكم الباب ...

وكونوا لأمكم وأختكم أعز الأحباب ....

يا بنى أنت وهو أسمعوا كلامى ...

خلونى أرتاح أنا فى منامى ....

أمكم حطوها فى عنيكم ....

وأختكم ماتهونشى فى يوم عليكم .....

وودعونى يا ولادى ببسمه ....

ودعواتكم خلوها عليا نسمه ...

تعرفوا قد إيه أنا بحبكم ...

لو بأيدى كنت أعيش عمرى جنبكم ...

لكن دى سنه الحياة ....

الكل مفارق معاه أو مش معاه ...

يا ولادى خليكم على طول أخوات ..

وفى يوم ميكونشى بينكم خلافات ..

واللى يسألكم قولوا أبونا حى لسه ما مات ..

لسه عايش بكلامه معانا ...

وحبه كبير جداً جوانا ....

عيشوا مع بعض فى سلام ...

دى وصيه منى ليكم قبل يا ولادى ما أنام ..

بقلــــــم: عـــــادل الشــــــهـــابى