الشاعر **م الجوجري الجوجري**
نفسى أكون شاعر........ شعر ( م . الجوجرى )
باكتب حاجه زى الشعر
ومُش حاَسِب نفسى مـِ الشُعرا
أصل الشِعر أهلُه دول أُمرا
والشعر له ناسُه وحُراسُه
عارفين الحرف فين يتحَط
ومكان الكِلمه فين تتخَط
تِتوزِن بالدهب كِلمتهم
والقوافى والبحور بِِيتهم
تلاقى فى كلامهم نغم
وموسيقى وساعات ألم
تحِسه وتمِسه من الكلمات
وتتأثر وتهِزك الأبيات
يِقدروا بحرفهم يحَمِسوك
وفى مره تانيه يسَكتوك
ومره يِفَرحوك ومره يِبَكوك
ويقربوك مِنهم ويِبعدوك
مره يعيشوك فى المقابر
ومره يسَكنوك قصر
هُما كِدا فُرسان الشعر
يطَلعوك السما ويركِبوك البحر
ويمَشوك فى الفضا والنهر
يعيشوك فى المدينه وحوارى الكَفر
يِعرفوا يصَوروا أفكارهم
ويرسِموها بيوت بأشعارهم
نفسى أكون زَيهم
وابقى واحد مِنهمٍ
ليست هناك تعليقات:
إرسال تعليق