نسمة الفجريه للشاعر**م. الجوجري الجوجرى**
نسمة الفجريه .... شعر (م . الجوجرى )
الله على نسمــة الفجريـه *** لما أكون صاحى واشمهـا
نسمـــه تُمر رقيقه طريه *** تداعب الخدود برقصـــها
لما تهــــز وتلمس المَيه *** وتنعش القلوب ببردهـــــا
زى صبيــه حلوه مِعَديه *** حنينه يضمك غزلهــــــــا
زيهـــا زى أكله شهيـــه *** تحبها ما تشبع منهــــــــا
زي أم طفلتهــــا بَكيـــــه *** تجرى تخدها فى حضنها
زى نغمه حلوه شجيــــه *** تنام وتقوم على لحنهـــــا
زى العطور الجايــــــــه *** من الجنه تفضح سرهــا
وتنشر روايح زكيــــــه *** هى كدا طول عمرهـــــــا
فى الصيف نسمه صفيه *** فى الشتا نتحمل بردهــــا
بتغازل العُبــــاد التقيـــه *** واللى سارحه لزرعهـــــا
واللى مسافره بالبدريــه *** واللى رايحه لشغلهــــــــا
روايحهـــا جميله نَديـــه *** الريحه دى بتعتها تخصها
تخاصـــم الشمس العَفيه *** لماتجففها وتشتت شملهـا
وتِقلب الهاديـــــه شقيـه *** وتضَيع حلاوتها وسحرهـا
ساعتها تكون الضحـــيه *** وتستنى غروبها ومشيهـا
دى غيره ودلع مش شِكيه *** انا شفتها بتمسح دمعهـــــا
ليست هناك تعليقات:
إرسال تعليق