مجلة نداء الرؤح

الشاعر الرائع **السيد امين**

التحويله

__________________________________

ع المحطه طالعه نازله .. 

واستراحه وناس كتير

والقطوره رايحه جايه .. 

واتخيلت من الصفير

من ساعات عماله ارن .. 

وانت مش عاوز تحن

قطر عدا وقطر هدا .. 

وقطر واقف ع الشريط

وانت لسه يا نور عنيا ..

بالغشم عامل حويط

انت مش مخلص لجرحك .. 

انت عدوانى فى مشاعرك

انت معدوم الضمير

المفتش والمعاون .. 

ع الرصيف رايحين جايين

والعيون اللى بشوفها .. 

حركت عندى الجنين

انا ع الشريط هنزل .. 

ومش هطلع يا زوق

وانت تيجى تروح براحتك ..

احنا تحت وانت فوق

بابا جاى شايفاه بعينى .. هناك بعيد

معدى ع التحويله جاى .. وسط الحديد

ماشى وسلاحه فى ايده .. 

والصدى راح من عليه

القلق باين عليه ..

والغضب باين سكن جوا فى عنيه

ارجع انت يا حبيب الروح .. 

وعيش عندك خلاص

بس وصيتك وصيه . انت روحك عدوانيه

ما فيهاش ريحة الحواس .. ااقفل خلاص

بابا بص القطر جاى .. 

اطلع انت ع الرصيف

بص لاخواتى الغلابه .. 

محتاجين حق الرغيف

انا نفسى يا ابا اموت ..

وجسمى يترمى فوق الظلط

عشان اسددلك يا بابا .. 

كل فواتير الغلط

انا شايفه ماما شايله غصن اخضر ..

فى ايدها وجوز حمام

الندى نازل عليا .. والقلق راح من عليا .. 

يلا يا ابا روح سلام

ماتت البنيه وابوها روح لامها ..

شايل سلام .. شايل كلام

هيا دى نهاية الهوى .. 

وهوا دا اخر الكلام ..

هوا دا اخر الكلام

__________________________________________

بقلم / السيد امين