عفوا للشاعر الرائع **السيد امين**
عفوا
=======
الهاتف اللى انت طالبه
باين عليه مشغول
أو الشبكة ساقطة
وبرا التغطية منقول
وممكن يكون رقمك
سببله حالة زهول
وكول تون جنابك نطق
وقال كلام معقول
الهاتف اللى انت طالبه
باين عليه مقفول
انا كنت مستنى روحى
تفتح تقولى الو
تحلى فى وشى الحياة
وساعتها عقلي يتوه
ايوووة عليك لما تعند
يا ستميت أيوووه
الشك عشش فى جسمي
والعقل توهتوه
ولا الزمن دا يا خالى
بيرخص الغالي
وببلاش بعتوه !
رقمك على الصادر
لاقبلك يا حبيبي ولا بعديك
علشان مينفعش حد
يتعدى الحد ويعديك
ولا انت عايش بمبدأ
ان اللى بيعديك
احسن من اللى بيجي فيك
برضه حبيبى وبحبك
وروحى دايبة فيك
معقول معاك تليفون
ومش عارف تجيب اسمى
ولا حتى عارف تميز عالجهاز
بين اسمى وبين رسمي
ولا انكتب عالحزين
يفضل حزين على طول
حتى على جبهته
مكتوب حزين رسمي
مكتوب حزين رسمي
============
بقلم /
السيد أمين
ليست هناك تعليقات:
إرسال تعليق