الشاعرالرائع محمود عمار الزلباني
(((((((أشتريت كفنك )))))))))
_________محمود عمار الزلباني
أول حنان إتولد
ياأمي كان حبك
والعطف لما إتوجد
إستقبله قلبك
الرحمة من طبعك
والجنة في قربك
زي النهارده
يا أمي كان العيد
عامل حسابي
وقلبي بيكي سعيد
فكرت أقدم في عيدك
هدية
لقيت الهدية عليكي
شوية
لأنك هدية رب البرية
يا أغلى الحبايب
يا أمي عليا
لكن في لحظة
لقيتك ضحية
ورحتي بعيد
يا أمي عليا
زي النهارده يا أمي
كان العيد
كسرت حصالتي
وجريت على الدكان
أشتري منديل أو طرحة
أو فستان
لكن التحويشة جابت
يا دوب منديل
رجعت بيه فرحان
وقلبي يقول مواويل
في أول شارعنا
يا أمي لقيت
دخان
وأطفال كتير تبكي
والدم ع الحيطان
حسيت ساعتها
إنهم غيروا المواعيد
حزن قلبي كتير
يا أمي في يوم العيد
وصاحبي قال أمك
قولت إشتريت لها
منديل
كرر وقال أمك
قولت معايا هديتها
قال اجري وشوف أمك
رصاصة الغدر صابتها
هدوا عليها الدار
نزلت على
الأرض باستها
دخلت بيتنا لقيته
كومة من التراب عالية
فضلت أدورعليكي
وأنادي يا غالية
لقيت على وشك
آخر البسمات
غطيته بمنديلك
والفرح عندي مات
حضنتك يا أمي كتير
سا محيني
يا غالية
باين إشتريت
كفنك
-----------محمودعمار الزلباني
ليست هناك تعليقات:
إرسال تعليق