سوريا شام العز بقلم الشاعرالرائع رفعت فايد
..............**** سوريا ..شام العز ****..............
-----------------------------------------------------
سوريا يا شام العروبه ... دمعنا أكاليل
عاللىّ بيجرى فى أرضك... من هدم مع تقتيل
يا غوطة الحب .. يا غاليه على قلوبنا
يابنت بردى .. وأهلك همّا حبايبنا
يا راية العز.. مين كسّر صواريكى
اّه يا دمشق وعمرى .. ما انسى لياليكى
علم وفن وثقافه .. والقصيد عربى
صباح يا فخرى .. ومليحه نوّرت دربى
دريد وخفه وفن عروبى م الأصلى
ونزار دا خلّيه لوحده ..دا حبيب قلبى
صعبان علىّ قوى .. شارع جميل بزهور
أشوف رصيفه مكسّر.. وبيت جميل مهجور
وطفل يبكى أمام جثة أبوه وامّه
حيروح لمين بعدهم ... ومين يشيل همّه ؟!!
وصبيّه زى القمر .. هايمه ف ظلام الليل
الله أعلم حتنجى ... وللّا ياخدها الليل
وعجوز وعكّازه جنبه .. انكسر منّه
عاوز ياعينى يقف .. ما حد جار منّه
وبيت كبير اتهدم ..عاللّى ساكنين فيه
ما عرفنا كم عدّهم ... ولا حتى حالهم إيه
لكن ورب الشهيد ... ياسوريا ما نسيبك
لعدو من جنسنا .. ولا تركى بيريدك
جيشك جنوده بواسل .. منصور بإذن الله
حترجعى لحضننا ... بالنصر بدل الاّه
وناكلوا فستق .. مع المتّى وبلح الشام
ونقفوا فوق الجبل .. ونشاوروا للأهرام
تفرح لكم مصرنا .. م القلب يوم النصر
ونهتفوا كلنا ... عيشتى يا سوريا ومصر .
.................................... ( رفعت فايد )**
ليست هناك تعليقات:
إرسال تعليق